pārena

pārena, (-‘ia). To smooth, stretch, press or iron sthg out flat, to take the kinks out of rope or a fishing line by stretching it.

Kua tāpipiri ‘aia i te tūtū ki runga i te pēpa mārōki‘aki‘a ma te pārena ‘aere kia tika.
He pasted the picture onto a piece of cardboard and smoothed it out flat;

Kua ‘āuri ‘aia i tōna kāka‘u ma te pārena ki te kāka‘u mā‘ū kia tika meitaki.
She ironed her dress, pressing it with a damp cloth to get it nice and straight;

Kua pārena‘ia tāna a‘o tautai i mua ake ka ‘aere ei ‘aia ki te ‘ī ‘a‘ai.
He got his line straightened out before he went fishing for tuna.
[pā-7, rena1.]

toro

toro, (-a, -‘ia), v.i.

1. Stretch, reach, spread out, extend, creep along (as creeping plant).

‘Auraka e ‘akaoriori i te rākau tanu ‘ōu, kāre i toro ake te aka.
Don’t disturb the newly planted tree, it hasn’t taken root yet;

Kua toro ‘aere te kākā nā runga i te patu. The kākā
creepers climbed along the wall;

Ko te au ‘ātava toro ki tēta‘i tua i te ‘āua tē tī pū.
Chop off the branches that have grown out over the fence;

‘E matie toro viviki mē tanu‘ia ki te ngā‘i mā‘ū‘ū.
When that type of grass is planted in damp places, it spreads like wildfire;

Kua toro te aka o te reira ‘iti tangata ki te au pā ‘enua rava rāi.
The people of that race spread all over the world;

Toroa tō rima ki roto i te rua ka ‘u‘uti mai ei i te ika ki va‘o.
Stretch your hand into the hole and pull the fish out.

2. Stick out, project.

E tī pū i te potonga i toro ki va‘o o te rākau.
Cut off the piece of wood sticking out;

E ‘akatika i te ngā‘i toro o te patu.
Level off the part of the wall that sticks out;

Kua toro tōna ngutu.
She was pouting;

Kua toro mai ki va‘o te mī miti o te ‘ā‘ā.
The sea eel poked its head out.

3. A cape, promontory, spit of land, projection.

E tū koe ki tēia toro, ‘ākara ‘ua ai ki te moana.
Stand on this headland and keep watch out to sea. Mato toro, a projecting cliff. ‘Are toro papa, a low rambling house. ‘E toro tai, an arm of the sea.

teretere

teretere, fq. tere.

1. (-a, -‘ia). Slice.

Kua teretere ‘aia i te ngā‘i kino o te kūmara.
He’s sliced the rotten parts off the kumara;

Ka meitaki ‘ua i te teretere i tēta‘i mānga kia iti mai.
It won’t do any harm to trim it a bit smaller;

Tereterea te pākiri o te au poupou ka ‘akatū ei.
Trim the bark off before you put the posts in.

2. Slide, slip, drift, move about, (be) loose etc.

Kua teretere ‘ua tōna vaevae i runga i te one i tōna tāpū‘anga i te taura.
His feet kept slipping in the sand as he took the strain on the rope;

‘E rākau teretere ‘ua tēnā, pātiā‘ia.
That plank is quite loose (moving about), nail it down;

Nō te teretere i te rākau nō reira i tāpeka‘ia ai.
The timber was tied down because it was moving to and fro.

3. Sail along, travel, etc.

Tērā e teretere maī ra ‘a ‘Ina mā mei te tango patito.
There come ‘Ina and her friends back from getting sea-hares;

Kua teretere te au vaka tautai ki te moana.
The fishing canoes put out to sea.

4. Stretch, give.

Kā teretere te rima i tō pona mē ‘uti‘uti koe.
You‘ll stretch the sleeves of your shirt dragging on them.